இணையத் தமிழ்க் கல்விக் கழகம்

 

இணையத் தமிழ்க் கல்விக் கழகம்

இந்தியாவில் இணையவழியில் கல்வி வளங்களையும் வாய்ப்புகளையும் உருவாக்கும் முயற்சியின் விளைவாக, தமிழ் இணையக் கல்விக் கழகம் பிப்ரவரி 17, 2001 ஆம் ஆண்டு நிறுவப்பட்டது. இதற்கான அறிவிப்பை அப்போதைய தமிழக முதல்வர் மு.கருணாநிதி அவர்கள் 1999ஆம் ஆண்டு நடைபெற்ற இரண்டாம் தமிழ் இணைய மாநாட்டின் நிறைவு விழாவில் அறிவித்தார். தற்போது தமிழ் இணையப் பல்கலைக்கழகம் ஆட்சிக்குழுவால் வழிநடத்தப்பட்டு ஒரு முழுநேர இயக்குநர் பொறுப்பில் செயல்பட்டு வருகின்றது.

கல்வித் திட்டம்

இணைய வழிக் கல்வித் திட்டம், மின் நூலகம், கணினித் தமிழ் வளர்ச்சி என இக்கழகம் பல்வேறு பணிகளை மேற்கொண்டு வருகின்றது. கல்வித் திட்டத்தின்கீழ்,

• சான்றிதழ்க் கல்வி மூன்று நிலைகளில் வழங்கப்படுகின்றது.
• தமிழ்மொழி இளங்கலைப் பட்டப்படிப்பும் அளிக்கப்படுகின்றது.
• மழலைக்கல்வி, பட்டயம், இளநிலைத் தமிழியல் பட்டம், சான்றிதழ்க்கல்வி, மேற்பட்டயம் ஆகிய கல்வித் திட்டங்களை அளித்து வருகின்றது.

மழலைக் கல்வி

மழலைக் கல்வியில் பாடங்கள், படங்கள், மழலைக் கதைகள், உரையாடல், எண்கள், எழுத்துகள், நிகழ்ச்சிகள், வழங்குச் சொற்கள், ஒலி, ஒளிக் காட்சிகள் வாயிலான இயக்கப்படங்கள் போன்றவை கற்பிக்கப்படுகின்றன.

சான்றிதழ்க்கல்வி

சான்றிதழ்க் கல்வி தமிழ்நாடு அரசின் கல்வித் திட்டத்தின்படி ஒன்று முதல் பன்னிரண்டு வகுப்பு வரையுள்ள தமிழ்க் கல்வித் திறனை வழங்குகின்றது. இது சான்றிதழ், மேற்சான்றிதழ் ஆகிய நிலைகளில் பின்வருமாறு வழங்கப்படுகின்றது.

1.     சான்றிதழ் (1 முதல் 6 வகுப்பு வரை)

·       அடிப்படைநிலை (1 மற்றும் 2ஆம் வகுப்பு)

·       இடைநிலை ( 3 மற்றும் 4ஆம் வகுப்பு )

·       மேல்நிலை (5 மற்றும் 6ஆம் வகுப்பு)

2.     மேற்சான்றிதழ்

·       மேற்சான்றிதழ் நிலை 1 (7 மற்றும் 8ஆம் வகுப்பு)

·       மேற்சான்றிதழ் நிலை 2 ( 9 மற்றும் 10ஆம் வகுப்பு)

·       மேற்சான்றிதழ் நிலை 3 ( 11 மற்றும் 12ஆம் வகுப்பு

இளநிலைத் தமிழியல் பட்டக் கல்விப் பட்டயம்

இளநிலைத் தமிழியல் பட்டக் கல்வியில் பட்டயம், மேற்பட்டயம் மற்றும் பட்டயச் சான்றிதழ்கள் ஒருங்கிணைத்து வழங்கப்படுகின்றன.

தமிழ் இணைய நூலகம்

தமிழ் இணையக் கல்விக் கழகப் பாடத்திட்டத்தில் அனைவரின் பயன்பாட்டிற்காகவும் நூலகம் உருவாக்கப்பட்டுள்ளது. இப்பகுதி நூலகம், சுவடிக் காட்சியகம், பண்பாட்டுக் காட்சியகம், தமிழிணையம் – மின்நூலகம் என்ற நான்கு பிரிவுகளைக் கொண்டுள்ளது.

1.நூலகம்

நூலகத்தில் நாட்டுடைமையாக்கப்பட்ட தமிழறிஞர்களின் நூல்கள், அகராதிகள், நிகண்டுகள், கலைச்சொல் தொகுப்புகள், சங்க இலக்கியங்கள் முதலானவை உள்ளன. மேலும், தமிழ் இலக்கண இலக்கிய நூல்கள், காப்பியங்கள், சிற்றிலக்கியங்கள், நெறி நூல்கள், நாட்டுப்புற இலக்கியங்கள், பாரதியார், பாரதிதாசன் கவிதைகள், கவிமணி தேசிய விநாயகம் பிள்ளை கவிதைகள், கவிஞர் கண்ணதாசன் படைப்புகள் எனப் பலவகையான நூல்களும் பதிவு செய்யப்பட்டுள்ளன. இது இணையக் கல்விக் கழகத்தில் பயில்வோர் மற்றும் உலகளாவிய தமிழ்ரக்ள பயன்பாட்டிற்கு உருவாக்கப்பட்டுள்ளது. குறிப்பாக, தமிழ்ச்சொற்களுக்கு இணையான ஆங்கிலச் சொற்களையும், ஆங்கிலச் சொற்களுக்கு இணையான தமிழ்ச் சொற்களையம் தேடிப் பெறும் வசதி உள்ளது.

2.சுவடிக் காட்சியகம்

பனையோலைகளில் எழுதப்பட்ட சுவடிகளுள், அதிவீர்ராம பாண்டியர், இடைக்காடர், வீரமாமுனிவர், காளமேகப்புலவர், வில்லிப்புத்தூரார், தாயுமானவர், சேக்கிழார், தொல்காப்பியத் தேவர், பொய்யாமொழிப் புலவர், நக்கீரனார், மெய்கண்ட தேவர், பவணந்தி முனிவர், கம்பர் உள்ளிட்ட பல புலவர்களின் ஓலைச் சுவடிகள் சுவடிக் காட்சியகம் எனும் பிரிவில் மின்னுருவாக்கம் செய்யப்பட்டுள்ளன.

3.பண்பாட்டுக் காட்சியகம்

· பண்பாட்டுக் காட்சியகம் என்ற பிரிவல் தமிழ்நாடு, தமிழ்நாட்டின் திருத்தலங்கள், திருவிழாக்கள், வரலாற்றுச் சின்னங்கள், கலைகள், விளையாட்டுகள் முதலிய வரைபடங்கள் உள்ளன. சைவ, வைணவ, கிறித்துவ, இசுலாமியக் கோவில்களின் ஒலி, ஒளிக் காட்சிப் பதிவுகள், நாட்டியம், மயிலாட்டம், ஒயிலாட்டம், காவடியாட்டம், பொம்மலாட்டம் உள்ளிட்ட பல கலைகள் பற்றிய சுருக்கமான விளக்கம், படக்காட்சிகள், ஒலி, ஒளிக் காட்சிகள் ஆகியவை விளக்கப்பட்டுள்ளன. தேவாரப் பாடல்களை இசையுடன் கேட்கும் வசதி உள்ளது.

4.தமிழிணையம் – மின் நூலகம்

·   தமிழ் இணையப் பல்கலைக்கழகத்தில், தமிழிணைய மின் நூலகம் என்னும் பிரிவு தனி இணைய தளத்துடன் செயல்படுகின்றது. அரசு நூல்கள், இதழ்கள், ஓலைச் சுவடிகள், அரிய காகிதச் சுவடிகள், கல்வெட்டுகள், நிழற்படங்கள், ஓவியங்கள், சிற்பங்கள், செப்பேடுகள் முதலிய பல ஆய்வு ஆதாரங்கள் இங்கே உள்ளன. தமிழ் இணையக் கல்விக் கழகத்தின் மின் கற்றலுக்கான இணைய தளம் e-learning web portal என்ற முகவரியில் செயல்படுகின்றது.

     தமிழ் இணையக் கல்விக் கழகத்தின் செயல்பாடுகள் 

தமிழ் மென் பொருள்கள் உருவாக்கம்   

தமிழ் இணையக் கல்விக் கழகத்தில், ஒருங்குறி எழுத்துருவைப் பரவலாக்க உதவும் திட்டங்கள் நடைபெற்று வருகின்றன. ஒருங்குறி மாற்றி, உரை உணர்தல், உரைச் சுருக்கம் தருதல், தானியங்கி மொழிபெயர்ப்பு, பேச்சு உணர்தல் மற்றும் பகுத்தல் முதலான பலவகைப் பயன்பாட்டு மென் பொருள்களும் உருவாக்கப்படுகின்றன.

சொற்பொழிவு

தமிழ்ப் பண்பாடு, கலை பற்றிய தொடர்ச் சொற்பொழிவு தமிழ் இணையக் கல்விக் கழகத்தால் மாதந்தோறும் நடத்தப்பட்டு வருகின்றது. இதில் பல்வேறு வல்லுநர்கள் பல்வேறு துறைகளில் இருந்து சொற்பாழிவு ஆற்றுகின்றனர்.

கணித் தமிழ்ப்பேரவை

தமிழ் இணையக் கல்விக் கழகத்தின் பரப்புரையின் முக்கிய நோக்கம் கல்லூரிகள் தோறும் கணித் தமிழ்ப் பேரவை நடத்தப்பட வேண்டும் என்பதாகும். இதுவரை அறிவியல், பொறியியல், மேலாண்மை மற்றும் மருத்துவம் உள்ளிட்ட நூறு கல்லூரிகளில் கணித்தமிழ்ப் பேரவைகள் தமிழ் இணையக் கல்விக் கழகத்தால் தொடங்கப்பட்டு, தமிழில் வலைப்பூக்கள் மற்றும் குறுஞ்செயலிகளை உருவாக்க மாணவர்களுக்குப் பயிற்சி அளிக்கப்படுகின்றது. இது போன்று நடத்தப்படும் கணித்தமிழ்ப் பேரவையானது,

· இணையத்தில் தமிழின் பங்களிப்பை வளப்படுத்துதல், வலுப்படுத்துதல், கணித்தமிழ் மற்றும் தமிழ்ப் பய்னபாட்டு மென் பொருள்களை உருவாக்கம் செய்ய ஊக்குவித்தல்

·       கட்டற்ற மென்பொருள் பய்னபாட்டை முன்னெடுத்தல்

·       கணித்தமிழ்த் திருவிழா நடத்துதல்

·       தமிழ் மென்பொருள், குறுஞ்செயலி உருவாக்கம்

·       கலைக்களஞ்சிய உருவாக்கம்

ஆகியவற்றை இலக்குகளாகக் கொண்டு செயல்பட்டு வருகின்றது.

பிற பணிகள்

தமிழ் மொழியின் பயன்பாடு அதிகரிக்க தமிழ் இணையக் கல்விக் கழகமும் விக்கிபீடியாவும் சேர்ந்து விழிப்புணர்வு நிகழ்ச்சிகளைப் பள்ளி கல்லூரிகளல் நடத்திட ஊக்குவிக்கின்றன. இணையத்தினைக் கொண்டு மாணாக்கர்கள் தமது கல்வி மற்றும் பொது அறிவுத் திறமைகளைப் பெருக்கிக் கொள்ள வழிவகுத்துள்ளது.

 

இணையத் தமிழ்ப்பயன்பாடு

இணையத் தமிழ்ப்பயன்பாடு

அறிவியலின் வளர்ச்சியால் இன்றைய உலகத்தை கைக்குள் அடக்கிவிட முடிகின்றது. அறிவியலின் அதி நவீன கண்டுபிடிப்பான கணினியே அதற்கு முக்கிய காரணம். 

இணையம்

பல கணினி வலையமைப்புகளின் கூட்டிணைப்பே இணையம் ஆகும். உலகம் முழுவதும் பரந்துள்ள இடைத்தொடர்பு வலையமைப்புகளே இணையம் உருவாக முன்னோடியாக இருந்தன.  இன்று மனித வாழ்வில் தகவல் தொடர்பு கூறுகளில் இணையம் முதன்மையாகத் திகழ்கிறது. மின்னஞ்சல் அனுப்பவதற்கு மட்டுமே பயன்படுத்தப்பட்ட இணையம், இன்று தரவுதளம் (Database Site), இணையவலைதளம் (Web Page), இணைய இதழ் (Internet Journal), இணைய வணிகம் (e-business), இணைய விளையாட்டு, இணைய நூலகம் (Internet Library), இணையவழிக் கல்வி, வலைப்பூக்கள் (Blogs), சமூக வலைத்தளங்கள் (Orkut, Facebook, Twitter) என பலப் பரிமாணங்கள் கண்டு மனித வளர்ச்சியில் தவிர்க்க முடியாத அங்கமாகிவிட்டது.

இணையத்தின் பயன்கள்

மின்னஞ்சல், இணைய உரையாடல், காணொளி பார்த்தல், விளையாட்டு, கல்வி என நமக்குத் தேவையான அனைத்தையும் இருந்த இடத்தில் இருந்தே பெற்றுக் கொள்ள இணையம் பயன்படுகின்றது. இணையத்தில் கிடைக்கின்ற தகவல்களின் மூலம் அறிவைப் பெருக்கிக் கொள்ள முடிகின்றது.

கணினியில் தமிழ்

கணினி என்றாலே ஆங்கிலத்தில் இயங்கக்கூடியது என்று பலரும் நினைத்துக் கொண்டிருக்கின்றனர். கணினியின் செயற்பாட்டு மென்பொருள்கள் பெரும்பாலும் ஆங்கில மொழியினைக் கொண்டு வடிவமைக்கப்படுவதால், கணினியின் செயல்பாடுகள், மற்றும் இணையச் செயல்பாடுகள் ஆங்கில மொழியைச் சார்ந்து அமைந்துள்ளன. ஒரு கணிப்பொறி பூஜ்யம், ஒன்று (0,1) எண்கள் அடங்கிய இரும (Binary) எண் குறியீடுகளைக் கொண்டுதான் செயல்படுகிறது. அதற்கு ஆங்கிலமோ, தமிழோ அல்லது வேறெந்த மொழியும் தெரியாது.

ஒரு மொழியை நாம் கணினியில் பயன்படுத்த வேண்டுமானால், அந்த மொழியின் ஒவ்வொரு எழுத்துக்கும் ஒவ்வொரு எண்ணை நிர்ணயிக்க வேண்டும். இவ்வாறு நிர்ணயிக்கும் முறையை நாம் குறியீட்டு முறை என்று அழைக்கிறோம். கணினி கணித அடிப்படையில் செயல்படக்கூடிய ஒரு கருவியாகும். அவ்வகையில், தமிழ்மொழி கணிதப் பண்புடைய மொழியாக இருப்பதால் கணினியில் தமிழைப் பயன்படுத்துவது சுலபம்.

கணினியில் தமிழை உருவாக்க உலகம் முழுவதிலும் பரவியுள்ள கணினித் தமிழ் வல்லுனர்கள் பல்வேறு முயற்சிகளை மேற்கொண்டனர். இவ்வாறு பல்வேறு இடங்களில் நடைபெற்ற முயற்சியின் விளைவாய் பல்வேறு தமிழ் எழுத்துருக்களும், அவற்றை இயக்க பல்வேறு விசைப்பலகை முறைகளும் உருவாக்கம் பெற்றன. இவற்றினை நெறிப்படுத்த பல கருத்தரங்குங்கள், மாநாடுகள் நடத்தி கணினியில் தமிழை வளர்த்தனர்.

இச்சூழ்நிலையில், பலரும் பல விசைப்பலகையைப் பயன்படுத்துவது பெரும் குறையாய் மாறிப்போனது. இக்குறையைப் போக்க கணினியில் உலக அளவில் ஒரே விசைப்பலகை முறையைப் பயன்படுத்த 1999-ஆம் ஆண்டு பிப்ரவரி எட்டாம் தேதி சென்னையில் நடைபெற்ற இரண்டாம் தமிழ் இணைய மாநாட்டில் தீர்மானம் நிறைவேற்றப்பட்டது. இவ்விசைப் பலகை முறையைத் தமிழகத்திலுள்ள அனைத்து மென்பொருள் தயாரிப்பாளர்களின் ஆலோசனையின்படி தமிழக அரசு வடிவமைத்துத் தந்தது.

இச்சமயத்தில் மைக்ரோசாப்ட் (Microsoft) நிறுவனம் வின்டோஸில் (Windows) தமிழைப் பயன்படுத்த துவங்கிய பின்பே பல்வேறு தமிழ் மென்பொருள் நிறுவனங்களும், ஆராய்ச்சியாளர்களும் பெரும் எண்ணிக்கையில் தமிழ் எழுத்து வடிவங்களை கணிப்பொறியில் அளிக்கத் துவங்கினார்கள். கூகுள் (Google) நிறுவனம் அறிமுகப்படுத்திய டிரான்ஸ்லிட்டரேஷன் (Transliteration) முறை தமிழ்ப் பயன்பாட்டை மக்களிடையே கொண்டு சேர்த்தது.

இணையத்தில் தமிழின் தோற்றம்

தமிழ் நாட்டிலிருந்து பல்லாண்டுகளுக்கு முன்பு வெளி நாடுகளுக்குச் சென்ற தமிழர்களின் வழித்தோன்றல்கள் இணையத்தின் வளர்ச்சியால், தங்களை ஒன்றிணைத்துக் கொள்ள தமிழை இணையத்தில் தோற்றம் பெறச் செய்யும் முயற்சியில் ஈடுபட்டனர். தங்கள் பாரம்பரியத்தைப் பாதுகாத்துக் கொள்ளவும், தமிழ்மொழி, இலக்கியம், வரலாறு, பண்பாடு, கலை ஆகியவற்றைத் தொடர்ந்து கற்றுத் தெளியவும் தமிழ் இணையதளங்களை உருவாக்க விரும்பினர். உலகின் பல பகுதிகளில் வாழ்ந்துவரும் கணிப்பொறியில் வல்லமைபெற்ற தமிழர்கள், தமிழைக் கணிப்பொறி மற்றும் இணையப் பயன்பாட்டில் கொண்டு செல்ல முயன்றனர். அம்முயற்சியின் விளைவே இன்று இணையப் பயன்பாட்டில் தமிழ் தலைசிறந்து வளர்கிறது.

இணையத்தில் தமிழின் வளர்ச்சி நிலை

ஒரு நாட்டின் மொழியை ஏற்றுக்கொள்ளாத கணிப்பொறி அந்நாட்டில் இயங்க முடியாது. கணிப்பொறியை ஏற்றுக்கொள்ளாத ஒரு மொழி வாழ முடியாது என்பது வரலாற்று உண்மையாகிவிட்டது. கணினியில் தமிழ்மொழியின் பயன்பாட்டிற்கு காரணம் நம் மொழியின் சிறப்பே ஆகும். ஏனெனில் தமிழ்மொழியில் எழுத்தமைப்பு, ஒலியமைப்பு, சொல்லமைப்பு, தொடரமைப்பு ஆகிய எல்லாவற்றிலும் ஒரு கட்டுக்கோப்பு இருக்கிறது. இத்தனை சிறப்பினை பெற்றிருப்பதால் கணினியில் தமிழ் மிகக் குறுகிய காலத்தில் நுழைந்தது. தமிழகத்தை விட்டுத் தொழில் காரணமாக அயல் நாடுகளுக்குச் சென்ற தமிழர்கள், தமிழைப் பேசவும், கேட்கவும் வழி இல்லாமல் இருந்த நிலையில் இணையம் மூலம் சந்தித்துக்கொள்ள தமிழில் மின்னஞ்சல்களையும், இணைய இதழ்களையும், இணையத் தளங்களையும் பயன்படுத்தினர்.

இதுபோன்ற ஆரம்பகட்ட முயற்சிகளே இன்று இணையத்தமிழ் என்ற துறையை வளர்த்தெடுத்தன. தமிழ் எழுத்துருக் குறியாக்க முயற்சிகள் 1980-இன் தொடக்கத்தில் மேற்கொள்ளப்பட்டன. உலகம் முழுவதிலும் பல்வேறு தமிழறிஞர்கள் 1984 முதல் 1995 வரை அவரவர்க்கென தனிகுறியீட்டு முறையை அமைத்து எழுத்துருக்கள், விசைப்பலகைகள் அமைத்து தமிழைக் கணினியிலும், இணையத்திலும் ஏற்றம் பெறச் செய்தனர். இணையத்தில் முதல் நிலையாகத் தாங்கள் கண்டுபிடித்த தமிழ் எழுத்துருக்கள் மூலமாக தமிழில் மின்னஞ்சல் அனுப்பினர். பின்னர் இணைய இதழ்களும், இணையத் தளங்களும் இணையத்தில் உருவாகின.

இணையம் தொடர்பான மாநாடுகள் – கருத்தரங்குகள்

தமிழில் இணையத்தளங்கள் செம்மையுற அமைவதற்கு பல கருத்தரங்குகளும், மாநாடுகளும் நடத்தப்பட்டன. இவை அரசாலும், சில தனியார் அமைப்புகளாலும் நடத்தப்பட்டன.

முதல் தமிழ்க் கணினி கருத்தரங்கு

‘தமிழும் கணிப்பொறியும்’ என்ற தலைப்பில் முதன் முதலில் கணினித்தமிழ் கருத்தரங்கு 1994-ஆம் ஆண்டு டிசம்பர் 5, 6 தேதிகளில் சென்னை அண்ணா பல்கலைக்கழகத்தில் கணிப்பொறித்துறைப் பேராசிரியர் வெ. கிருஷ்ணமூர்த்தியின் அவர்களின் முன் முயற்சியால் நடத்தப்பட்டது. தமிழ் எழுத்துருக்கள், சொற் செயலிகள், கணினி கலைச் சொற்கள், மற்றும் விசைப்பலகையைத் தரப்படுத்துதல் ஆகியவற்றை நோக்கமாகக் கொண்டு இக்கருத்தரங்கு நடத்தப்பட்டன. இணையத்தமிழ் வரலாற்றில் இக்கருத்தரங்கம் ஒரு திருப்பமாக அமைந்தது.

முதல் உலகத் தமிழ் இணைய மாநாடு

சென்னை அண்ணா பல்கலைக்கழகத்தில் நடந்த கருத்தரங்கை அடுத்து மூன்று ஆண்டுகள் கழித்து சிங்கப்பூரில் ‘தமிழ் இணையம் 97’ என்னும் பொருளில் முதல் தமிழ் இணைய மாநாடு 1997-ஆம் ஆண்டு மே 17, 18 தேதிகளில் நடைபெற்றது. சிங்கப்பூர் நாங்யாங் பல்கலைக்கழகப் பேராசிரியர் நா. கோவிந்தசாமியின் முன் முயற்சியால் இம்மாநாடு நடத்தப்பட்டது. இம்மாநாட்டில் தமிழகம், மலேசியா, இலங்கை, சிங்கப்பூர், ஐரோப்பா, அமெரிக்கா போன்ற பல நாடுகளிலிருந்து தமிழ் மென்பொருள் வல்லுநர்களும், கணினித்தமிழ் அறிஞர்களும் கலந்து கொண்டனர். இம்மாநாட்டில் இணையத்தளங்களில் தமிழ்ப் பொருண்மைகளை மிகைப்படுத்துதல், விசைப்பலகையைத் தரப்படுத்துதல், தமிழ் எழுத்துருக் குறியீட்டைத் தரப்படுத்துதல், அடுத்த இணைய மாநாடு நடத்துவது பற்றியும் விவாதிக்கப்பட்டு முடிவு செய்தனர்.

இரண்டாவது உலகத் தமிழ் இணைய மாநாடு

இரண்டாவது உலகத் தமிழ் இணைய மாநாடு தமிழக முதல்வர் கலைஞர் அவர்கள் தலைமையில், நடுவணரசின் அமைச்சராக இருந்த முரசொலி மாறனை வரவேற்புக் குழுத் தலைவராகக் கொண்டு 1999-ஆம் ஆண்டு பிப்ரவரி மாதம் 7, 8 தேதிகளில் ‘தமிழ் இணையம் 99’ (Tamil Net 99) என்னும் தலைப்பில் நடத்தப்பட்டது.

இம்மாநாட்டில் விசைப்பலகைத் தரப்பாடு தொடர்பாகவும், எழுத்துரு தொடர்பாகவும் வழங்கப்பட்ட கருத்தாய்வுகளைத் தொகுத்து ஒருங்கிணைப்பு செய்ய இரு குழுக்கள் அமைக்கப்பட்டன.  இம்மாநாட்டின் மூலமாக ஒரே தமிழ் எழுத்துமுறையாக ‘டாம்’ (TAM) வகையும், ஆங்கில தமிழ் கலப்பு எழுத்துரு முறையாக ‘டாப்’ (TAB) வகையும் அறிமுகப்படுத்தப்பட்டன. தமிழ் மென்பொருள் ஆராய்ச்சி மானியக்குழு ஒன்று அமைப்பதற்காக தீர்மானம் நிறைவேற்றப்பட்டது.

உலகம் முழுவதிலும் உள்ள தமிழர்களுக்காக இணையம் வாயிலாக உலகத் தமிழ் இணையப் பல்கலைக்கழகம் (Tamil Virtual University) ஒன்றை நிறுவுவதற்கான அறிவிப்பு வெளியிடப்பட்டது, இன்று இப்பல்கலைக்கழகம் ‘tamilvu.org’ என்ற பெயரில் பல்வேறு வளர்ச்சி பெற்று இயங்கிவருகிறது. இம்மாநாடு தமிழ் இணைய வரலாற்றில் ஒரு மைல் கல்லாக அமைந்தது.

மூன்றாவது உலகத் தமிழ் இணைய மாநாடு – 2000

மூன்றாவது உலகத் தமிழ் இணைய மாநாடு சிங்கப்பூரில் நடைபெற்றது. சிங்கப்பூர் தேசியப் பல்கலைக்கழகப் பேராசிரியர் அருண் மகிழ்நன் ஒருங்கிணைப்பில் இம்மாநாடு 2000-ஆம் ஆண்டு ஜீலை மாதம் 22, 23, 24-ஆகிய நாட்களில் ‘தமிழ் இணையம் 2000’ எனும் தலைப்பில் நடைபெற்றது. இம்மாநாட்டில் ‘உத்தமம்’ – உலகத்தமிழ்த் தகவல் தொழில்நுட்ப மன்றம் என்று தமிழிலும் INFIT – International Forum for Information Technology in Tamil என்று ஆங்கிலத்திலும் குழுவொன்று உருவாக்கப்பட்டது.

உத்தமம் குழு உருவான பின்னர் பல்வேறு ஆய்வுப் பணிக்குழுக்கள் உருவாக்கப்பட்டன. அவை, தமிழ் கலைச்சொல் தொகுப்பு, யூனிகோடு தமிழ் ஆய்வு, இணையத்தள தமிழ் முகவரி வடிவமைத்தல், தமிழ் வரிவடிவக் குறியீட்டுத் தரப்பாடு, ஆங்கில வரிவடிவத் தமிழ்த் தரப்பாடு, தமிழ் எழுத்துரு படித்தறிதல் (Tamil OCR), லினக்ஸில் தமிழ் (Tamil in Linux), தமிழ் அனைத்து எழுத்துரு 16-பிட்டு தரம் போன்ற ஆய்வுகளை நடத்தி வருகின்றன. இக்குழுவில் உலகம் முழுவதிலும் வாழும் பல்வேறு தமிழ் கணினி வல்லுநர்கள் ஒன்றிணைந்தனர். இக்குழு மூலமே இனிவரும் காலங்களில் உலக இணையத் தமிழ் மாநாடுகள் நடத்தப்படும் என்று முடிவெடுக்கப்பட்டன.

இணையத் தமிழ் மாநாடுகளின் விவரங்கள்

தமிழ் இணைய வரலாற்றில் புரட்சி உருவாக பல்வேறு இணையத் தமிழ் மாநாடுகள் உதவின. அம்மாநாடுகளில் தமிழ்த்தகவல் தொழில்நுட்பக் கண்காட்சி உள்ளிட்ட பல பணித்திட்டங்கள் ஆய்வு செய்யப்பட்டதுடன், தமிழ் யூனிகோடு சிக்கல்கள் தொடர்பாக யூனிகோடு குழும உறுப்பினர்களோடு கலந்தாய்வு, உலக அளவில் நடத்தப்பட்ட இணையதள வடிவமைப்புப் போட்டி, இணையவழிக் கல்வி, மொழிப் பகுப்பாய்வு, தமிழ்த்தரவுகள், மின்னகராதிகள், இணையவழி தமிழ் கற்றல்-கற்பித்தல், கணினிவழி மொழியியல் ஆய்வுகள், சொற்திருத்திகள், பேச்சு மற்றும் சொற்பகுப்பு ஆய்வுகள், எழுத்து உணரி செயற்பாடுகள், கையடக்க கருவிகளில் தமிழ், தமிழ் ஒருங்குறி ஆகிய தலைப்புகளில் ஆய்வுகள் செய்யப்பட்டமை குறிப்பிடத்தக்கது.

இணையவழிக் கருவூலங்கள்

தமிழ் மொழியில் உள்ள இலக்கியம், இலக்கணம், அகராதிகள் முதலானவற்றைப் பற்றிய தகவல்களைப் பெறவும், பதிவிறக்கம் செய்யவும் பின்வரும் இணையதளங்கள் உதவுகின்றன. அவை, 

• தமிழ் விக்கிப்பீடியா
• தமிழ்மரபு அறக்கட்டளை
• எண்ணிம நூலகம்
• மின்னகராதி
• வலைப்பூக்கள்
• செய்தியோடைத் திரட்டி ஆகியனவாகும்.

இணையச் செய்தி ஊடகம்

தமிழ் இணைய இதழ்கள், மின் செய்தித்தாள்கள், இணைய வானொலி, இணைய தொலைக்காட்சி ஆகியவற்றை இருந்த இடத்திலேயே இணையம் மூலமாகப் பெற முடிகின்றது.

நன்றி விகாஸ்பீடியா மற்றும் வனிதா பதிப்பகம்

https://education.vikaspedia.in/viewcontent/education/baabafba9bc1bb3bcdbb3-ba4bc6bbeb9fbb0bcdbaabc1b95bb3bcd/b87ba3bc8bafba4bcd-ba4baebbfbb4bcd-