புதுக்கவிதை - ஒவ்வொரு புல்லையும் பெயர் சொல்லி அழைப்பேன்

 

ஒவ்வொரு புல்லையும் பெயர் சொல்லி அழைப்பேன்

கவிஞர் இன்குலாப்

ஒவ்வொரு புல்லையும் பெயர் சொல்லி அழைப்பேன்

பறவைகளோடு எல்லை கடப்பேன்

பெயர் தெரியாத கல்லையும் மண்ணையும்

எனக்குத் தெரிந்த சொல்லால் விளிப்பேன்

நீளும் கைகளில் தோழமை தொடரும்

நீளாத கையிலும் நெஞ்சம் படரும்

எனக்கு வேண்டும் உலகம் ஓர்கடலாய்

உலகுக்கு வேண்டும் நானும் ஓர்துளியாய்

கூவும் குயிலும் கரையும் காகமும்

விரியும் எனது கைகளில் அடையும்

போதியின் நிழலும் சிலுவையும் பிறையும்

பொங்கும் சமத்துவப் புனலில் கரையும்

எந்த மூலையில் விசும்பல் என்றாலும்

என்செவிகளிலே எதிரொலி கேட்கும்

கூண்டில் மோதும் சிறகுகளோடு

எனது சிறகிலும் குருதியின் கோடு!

சமயம் கடந்த மானுடம் கூடும்

சுவரில்லாத சமவெளிதோறும்

குறிகளில்லாத முகங்களில் விழிப்பேன்

மனிதம் என்றொரு பாடலை இசைப்பேன்.

கவிதையின் விளக்கம்

இயற்கையோடு இணைந்து வாழ்வதும், பிற உயிர்களுக்குத் துன்பம் விளைவிக்காமல் இருப்பதும், துன்பப்படும் உயிர்களைக் காப்பதும், சாதி, மதம், இனம் என்ற பேதமைகளை நீக்கி ஒன்றுபட்டு வாழ்வதும், சமத்துவ உலகைப் படைப்பதுமே மனிதம் ஆகும் என்ற கருத்தை இக்கவிதையின் வழி எடுத்துரைக்கின்றார் கவிஞர். ஆகையால் தன்னைப் பறவையாக, மரமாக, கடலாக உருவகப்படுத்திக் கொள்கின்றார்.

புல்லைப் பெயர் சொல்லி அழைப்பேன்

          பரந்துபட்ட இவ்வுலகத்தில் உள்ள உயிரினங்கள் யாவும் ஏதோ ஒரு நோக்கத்தை நிறைவேற்றவே படைக்கப்பட்டிருக்கின்றன. புல் உயிரினம், அளவில் சிறியது எனினும், புல் உள்ள இடமே உயிரினங்கள் வாழத் தகுதியுள்ள இடமாகும். ஆகவே, மனிதர்களை எவ்வாறு பெயர் சொல்லி அழைக்கின்றேனோ அதுபோல, உலகம் இயங்கக் காரணமாக இருகு்கும் ஒவ்வொரு புல்லையும் நான் பெயர் சொல்லி அழைத்து மகிழ்வேன்.

பறவைகளோடு எல்லை கடப்பேன்

மனம் விரும்பிய திசையெல்லாம் பறந்து, திரிந்து, எல்லைகளைக் கடந்து, தம் வாழ்வின் தேவைகளை நிறைவேற்றிக் கொள்ளும் இயல்புடையவை பறவைகள். அப்பறவைகள் போன்று மனிதர்களை இனம் பிரிக்கும் சாதி, இனம், மதம், மொழி என்ற எல்லைகளைக் கடந்து, மனித குலத்திற்குப் பயனுள்ள மனிதனாக வாழ்ந்து என் படைப்பின் நோக்கத்தை நிறைவேற்ற விரும்புகின்றேன்.

கல்லுக்கும் மண்ணுக்கும் பெயரிடுவேன்

          கற்களும் மணல்பரப்புகளும் இவ்வுலகம் நிற்காமல் இயங்கத் துணை புரிகின்றன. அவற்றை மகிழ்வுடன் காத்து அக்கல்லுக்கும் மண்ணுக்கும் நான் விரும்பிய பெயர் சூட்டி மகிழ்வேன்.

தோழமை கொள்வேன்

இவ்வுலகில் மனித உயிரினம் தவிர வேறு எந்த உயிரினங்களும் வேற்றுமை கொண்டு வாழ்வதில்லை. அவற்றைப்போல நானும் அனைத்து மக்களிடமும் வேற்றுமை பாராது நட்பு கொள்ள விரும்புகின்றேன். தோழமையோடு நீளுகின்ற என் கரங்களை ஏற்றுக் கொள்பவர்களிடம் அன்பு பாராட்டுவேன். என்னை விரும்பாதவர்களிடம் என் பாசத்தையும், பரிவையும் பகிர்ந்து கொள்வேன்.

கடலில் நான் ஒரு துளியாவேன்

கடல் ஓயாமல் ஒலித்துக் கொண்டே இருக்கும் இயல்புடையது. அது எண்ணற்ற உயிரினங்களின் புகலிடமாக விளங்குகின்றது. தன்னிடத்து வரும் நன்மையோ, தீமையோ அனைத்தையும் தனக்குள் அடக்கும் வல்லமை கொண்டது. ஆகையால், இந்த உலகமே எனக்குக் கடலாக மாற வேண்டும். உலகுக்கு நன்மை பயக்கும் செயல்களைச் செய்து அந்தக் கடலில் நானும் ஒரு துளியாக இணைய வேண்டும்.

மரமாவேன்

உயிரினங்கள் வாழவும், அவற்றைப் பசியாற்றவும் வல்லவை மரங்கள். கூவுகின்ற குயிலும், கரைககின்ற காகமும் வேற்றுமை பாராது எவ்வாறு ஒரே மரத்தில் இளைப்பாறுகின்றனவோ, அதுபோல மனிதர்களிடத்து எவ்வித வேற்றுமையும் பாராது, நானும் விருப்பு வெறுப்பின்றி செயல்படவே விரும்புகின்றேன் .

சமத்துவப்புனல்

போதி மரத்தினடியில் ஞானம் பெற்ற புத்தனும், சிலுவையின் நிழலில் இளைப்பாறும் கிறித்துவனும், பிறையின் ஒளியில் வாழ்கின்ற இசுலாமியனும் சமத்துவம் என்ற கடலில் கரைந்து ஒன்றாக வேண்டும்.

எவ்வுயிரும் தம்முயிரே

எவ்வுயுிரையும் தம் உயிர்போல் எண்ணுபவனே இந்த உலகில் வாழத் தகுதியுள்ளவன் ஆவான். எங்கு மனிதர்கள் துன்பப்படுகின்றனரோ, எங்கு மனிதர்கள் வாழ முடியாமல் தத்தளிக்கின்றனரோ, அங்கெல்லாம் எம் உதவிக்கரங்கள் நீள வேண்டும்.

கூண்டில் அடைப்பட்ட பறவைகள் கூண்டைவிட்டு வெளியேற முயற்சிக்கும்போது சிறகுகள் முறிந்து குருதி வழிய துன்பப்படும். ஆனால் கூண்டை உடைத்து வெளியே வந்துவிட்டால், அந்த வலிகள் யாவும் நீங்கிச் சுதந்திரக் காற்றை மகிழ்வோடு சுவாசிக்கும்.  அதுபோல, மனிதனாகப் பிறந்த யாவரும் தனக்குத் துன்பம் விளைவிக்கின்ற சூழ்நிலைகளில் இருந்து வெளியேற முயற்சிக்கும்போது காயங்கள் ஏற்படினும், வெற்றியுடன் வாழலாம் என்ற தத்துவத்தை அப் பறவைகளிடம் இருந்து கற்றுக்கொண்டேன். அதனால் எனது சிறகிலும் குருதியின் கோடு படிந்திருக்கின்றது.

சமயம் கடந்த மானுடம்

புற்களைப்போல, பறவைகள்போல, மரங்களைப்போல, கடலைப்போல வாழ்ந்து காட்டுவேன். சமத்துவ உலகைப் படைப்பேன். கோவில், தேவாலயம், மசூதி என்ற சுவர்கள் இல்லாத சமவெளிகளில், மதத்தை, இனத்தைக் குறிக்கின்ற அடையாளங்கள் ஏதும் இல்லாத முகங்களில் விழிப்பேன். அப்போது மனிதம் என்றொரு பாடலை இசைத்து மகிழ்வேன் என்று கூறுகின்றார் கவிஞர். இக்கவிதையின் மூலமாக, சமத்துவ உலகைக் காண விரும்பிய கவிஞரின் கனவை அறியமுடிகின்றது.

 

 

 

புதுக்கவிதை - ஒரு கடிதம் அனாதையாகிவிட்டது

 

ஒரு கடிதம் அனாதையாகிவிட்டது

 கவிஞர் மு.மேத்தா

என் முதல் காதல் கடிதம்

முகவரி

சரியாக எழுதப்படாத

ஒரு கடிதம்

எங்கெங்கோ சென்று

முட்டி மோதி அலைந்துவிட்டு

என்னிடமே திரும்பி விட்டது.

ஒரு கடிதம் அனாதையாகிவிட்டது!

சேரும் முகவரி சரியில்லை

அனுப்பிய முகவரி அதில் இல்லை

பற்பல ஊர்களின்

முத்திரை பதிந்தது !

பற்பல தெருக்களில்

விசாரணை நடந்தது!

பற்பல தினங்கள்

பறந்து கடந்தது!

பிறந்த இடத்தின்

பெயரே இல்லை!

புகுந்த இடமோ

புரியவில்லை!

அந்தக் கடிதத்தை

அஞ்சல் நிலையங்கள்

ஆராய்கள் செய்தன!

ஒட்டியிருந்த

உறையின் உள்ளே

இருந்த தாளில்

எழுதியிருந்தது இப்படி!

“ஒருவாரத்திற்குள்

உங்கள் பதில் வரவேண்டும்

இல்லாவிட்டால்

உயிர்ப் பறவை சிறகடிக்கும்

கடைசி முத்தமிட என்

கல்லறைக்கு வரலாம்”.

இங்குக் கடிதம் மட்டுமல்ல…

என் காதலும் அனாதையாகி விட்டது!

கவிதையின் விளக்கம்

ஒரு செய்தியை அதிவிரைவாகப் பரிமாற்றம் செய்து கொள்ள இன்றைய தொழில்நுட்பங்கள் உதவி செய்கின்றன. தொழில்நுட்ப வளர்ச்சியை எட்டாத அக்காலச் சூழலில் செய்தி பரிமாற்றக் கருவியாகக் கடிதங்கள் செயல்பட்டன. அந்தக் கடிதங்கள் உரியவரிடம் சேர குறைந்த பட்சம் இரண்டு நாட்கள் தேவைப்படும். சேர வேண்டிய முகவரியும், அனுப்புபவரின் முகவரியும் தெளிவாக எழுதப்படவில்லையெனில் அக்கடிதம் உரியவரிடம் சேராமல் அஞ்சல் நிலையங்களையே சுற்றிச்சுற்றி வரும். சில வேளைகளில் எழுதியவருக்கே போய்ச் சேர்வதும் உண்டு. இச்சூழலை “ஒரு கடிதம் அனாதையாகிவிட்டது” என்ற கவிதையில் படைத்துக் காட்டுகின்றார் கவிஞர்.

சுற்றித் திரிந்த கடிதம்

காதல் கொண்ட  ஒரு பெண், தன் காதலனுக்குத் தன் காதலை ஏற்றுக் கொள்ள வேண்டுமென்று கடிதம் எழுதுகின்றாள். அவசரத்தில் முகவரியைச் சரியாக எழுதவில்லை. தன் முகவரியையும் தெளிவாகக் குறிப்பிடவில்லை. கடிதத்தை அப்படியே கொண்டு போய் அஞ்சல் நிலையத்தில் சேர்த்து விட்டாள்.

முகவரி சரியாக எழுதப்படாததால், அக்கடிதம் எங்கெங்கோ சென்றது. பல ஊர்களுக்குப் பயணப்பட்டது. பல அஞ்சல் நிலையங்களின் முத்திரையை வாங்கிக்கொண்டது. தெருக்கள் தோறும் அக்கடிதம் குறித்து விசாரணை நடந்தது. நாட்கள் பல கடந்து சென்றன. யார் எழுதியது என்பது தெரியவில்லை. யாருக்கு எழுதியது என்பதும் புரியவில்லை. அஞ்சல் நிலையங்கள் அக்கடித்தை ஆராய்ச்சி செய்து தோற்றன. இறுதியாக, அக்கடிதம் அந்தக் காதலியிடமே வந்து சேர்ந்தது.

கடிதத்தோடு காதலும் அனாதையாகிவிட்டது

கடிதத்தின் உள்ளே “ஒருவாரத்திற்குள் உங்கள் பதில் வரவேண்டும். இல்லாவிட்டால்  உயிர்ப் பறவை சிறகடிக்கும்.  கடைசி முத்தமிட என் கல்லறைக்கு வரலாம்” என்று எழுதியிருந்தது. தான் அனுப்பிய கடிதம் உரியவனிடம் சேராமல் தனக்கே வந்து சேர்ந்ததை எண்ணிக் கலங்கியவளாய், “இங்குக் கடிதம் மட்டுமல்ல, என் காதலும் அனாதையாகிவிட்டது” என்று வருத்தம் கொள்கின்றாள்.

கருத்து

ஒரு செய்தி முறையாக, மிகக் கவனமாகப் பரிமாற்றம் செய்யப்படவில்லையெனில் வாழ்க்கை பல நேரங்களில் கேள்விக்குறியாகி விடுகின்றது என்பதை இக்கவிதையின்வழி எடுத்துரைக்கின்றார் ஆசிரியர். கவிஞர் தம் முதல் காதலைக் கூறுவதாகவும் இக்கவிதையைப் புரிந்து கொள்ளலாம்.

 

அடிப்படைத்தமிழ் - சொல் - விளக்கம்

 

சொற்கள் (WORDS)

சொல்  - விளக்கம்

ஓர் எழுத்து தனித்து நின்றோ, பல எழுத்துகள் சேர்ந்து நின்றோ ஒரு பொருளைத் தந்தால் அது சொல் எனப்படும்.

சான்று (Example)

கை – தனியாக நின்று உடல் உறுப்பு என்ற பொருளைத் தருகின்றது.

அம்மா – பல எழுத்துகள் சேர்ந்து நின்று அன்னை என்ற பொருளைத் தருகின்றது.

[ A word is a letter or combination of letters that have meaning. When a letter of combination does not give meaning, then it is not a word]

ஓரெழுத்து ஒரு மொழி

ஓர் எழுத்து மட்டும் தனியான நின்று பொருள் தரும் சிறப்பு தமிழ் மொழியில் மட்டுமே உண்டு. இதற்கு “ஓரெழுத்து ஒரு மொழி” என்று பெயர்.

 [ There are lot of one letter words in tamil. For example:  பூ (flower),  கை (hand) are letters that have meaning to them.]

சான்று (Example)

எழுத்து	பொருள்
ஆ	பசு (cow)
ஈ	ஓர் உயிரினம்  (house fly)
கா	சோலை (park)
மா	விலங்கு (animal)
தீ	நெருப்பு (fire)
வீ	மலர் (flower)
பூ	மலர் (flower)
கோ	மன்னன் (king)
கை	ஓர் உறுப்பு (hand)
தை	மாதத்தின் பெயர் (month)

 

சொல் வகைகள் – KINDS OF WORDS

சொல் நான்கு வகைப்படும். அவை,

1.     பெயர்ச்சொல் (Noun)

2.     வினைச்சொல் (Verb)

3.     இடைச்சொல் (Conjuction)

4.     உரிச்சொல் (Adjective)

என்பனவாகும். [Depending upon their useage in the sentences the words are catagorised as Peyar chol, Vinai chol, Idai chol, Urichol.]

1.பெயர்ச்சொல் (NOUN)

          ஒன்றன் பெயரை உணர்த்தும் சொல் பெயர்ச்சொல் ஆகும். இது பொருள் (things), இடம் (place), காலம் (time), சினை (part of the body), குணம் (character), தொழில் (activities) என்பனவற்றின் அடிப்படையில் தோன்றும். எனவே, இவற்றை பொருட்பெயர், இடப்பெயர், காலப்பெயர், சினைப்பெயர், பண்புப்பெயர், தொழிற்பெயர் என்று அழைப்பர்.

(There are six types of tamil nouns. They are nouns that refer to names, places, time, body parts, describing characters, indication of some kind of action.)

சான்று

1.     பொருட் பெயர் - மனிதன் (man), புத்தகம் (book), பசு (cow)

2.     இடப்பெயர்   - சென்னை (Chennai), மதுரை (Madurai), இந்தியா (India)

3.     காலப்பெயர் - மணி (Time), நாள் (day), மாதம் (month)

4.     சினைப்பெயர் - கண் (Eye), கை(hand), கிளை (branch)

5.     பண்புப்பெயர் - இனிமை (sweet), நீளம் (length), சிறியது(small)

6.     தொழிற்பெயர் - படித்தல் (reading), உண்ணல் (eating), உறங்கல் (sleeping)          

பெயர்ச்சொல் திணை, பால், எண், இடம், வேற்றுமை ஆகியவற்றைத் தெரிவிப்பதாகவும் அமையும். [ Noun is a word that helps a name or a person. Nouns have five parts of them. They are Thinai (class), Paal (gender), Enn (count), Idam (place), Vetturumai (difference).]

திணை (CLASS)

திணை என்பது ஒழுக்கத்தைக் குறிக்கும். இது,

1.     உயர்திணை (Upper class)

2.     அஃறிணை (Inferior class)

என இருவகைப்படும்.

உயர்திணை  

ஆறறிவு படைத்த மக்கள், தேவர்கள், கடவுள்கள் உயர்திணைகளாவர். (Humans are known as Uyarthinai. Supernatural living beings like gods, demons are also considered as Uyarthinai)

சான்று  

மக்கள்   - கீதா, கண்ணன்

தேவர்    - இந்திரன் 

கடவுள்   - முருகன், இயேசு, அல்லா

அஃறிணை  

உயர்திணை அல்லாத உயிருள்ள பொருள்கள், உயிரற்ற பொருள்கள் அஃறிணைகளாவர். (Dead, non-viable and all living beings except humans are known as Ahrinai)

சான்று

பசு, பாம்பு – அஃறிணை உயிர்ப்பொருள்

மலை, ஆறு – அஃறிணை உயிரற்ற பொருள்

 

பால் (GENDER)

பால் என்பது பகுப்பு அல்லது பிரிவு எனப்படும். இது

1.     ஆண்பால்

2.     பெண்பால்

3.     பலர்பால்

4.     ஒன்றன்பால்

5.     பலவின்பால்

என ஐந்து வகைப்படும். இவற்றுள் ,

ஆண்பால், பெண்பால், பலர்பால் – உயர்திணைக்கு உரியவை

ஒன்றன்பால், பலவின்பால் – அஃறிணைக்கு உரியவை.

ஆண்பால் (Aan paal) (male)

          ஆண் ஒருவனைக் குறிப்பது.

சான்று - சங்கர், கார்த்திக்

பெண்பால்  (Pen paal) (female)

பெண் ஒருத்தியைக் குறிப்பது.

சான்று  - கீதா, கவிதா

பலர்பால் (Palar paal)

 ஒன்றுக்கு மேற்பட்ட நபர்களைக்குறிப்பது.

சான்று – மக்கள், மாணவிகள்

ஒன்றன்பால் (Onran paal)

அஃறிணையில் ஒன்றைத் தனியாகக் குறிப்பது.

சான்று – புலி, மயில்

பலவின்பால் (Palavin paal)

அஃறிணையில் ஒன்றுக்கு மேற்பட்டவற்றைக் குறிப்பது.

சான்று புலிகள், மயில்கள்.

[The nouns also can be categorized as gender nouns (paal). The male gender is called Aanpaal. The female gender is called Penpaal.  When you catagorise the nouns on gender we have to remember the role of respect. When giving respect the verb endings will take plural form. It is called Palar paal. Singular for the inferior class – one thing – it is called onran paal. Plural for the inferioe class – more than one things – it is called palavin paal]

எண் (count)

பொருட்களின் எண்ணிக்கையைத் தெரிவிப்பது எண் எனப்படும். இது ஒருமை, பன்மை என இருவகைப்படும்.

ஒருமை  (Singular)

உணர்திணையிலோ, அஃறிணையிலோ ஒரு பொருளைக் குறிக்க வரும் பெயர் ஒருமை எனப்படும்.

சான்று – நான், அவன், இது, குயில், கல்

பன்மை (Plural)

உணர்திணையிலோ, அஃறிணையிலோ ஒன்றுக்கு மேற்பட்ட பொருட்களைக் குறிக் வரும் பெயர் பன்மை எனப்படும்.

சான்று – நாம், அவர், இவை, குயில்கள், கற்கள்

மூவிடம்

மனிதன் தான் நினைத்ததைத் தானாகவே பேசிக் கொள்வது உண்டு. தன் கருத்தை மற்றொருவனுக்கு எடுத்துக் கூறி இருவராகக் கலந்து பேசுவது உண்டு. இந்த இருவரிடத்து சொல் பிறப்பதால் அதை இடம் என்று குறித்தனர். இடம் மூன்று வகைப்படும். அவை, தன்மை, முன்னிலை, படர்க்கை.

தன்மை (First person)

சொல்பவன் பெறும் இடம் தன்மை ஆகும்

சான்று  -  நான்

முன்னிலை (Second person)

முன் நின்று கேட்பவன் பெறும் இடம் முன்னிலை ஆகும்.

சான்று - நீ

படர்க்கை (Third person)

பேசுபவன், கேட்பவன் இவ்விருவரையும் அல்லாது மற்றறொருவர் பெறும் இடம் படர்க்கை ஆகும்.

சான்று – அவன்

சான்று (EXAMPLE)

நான் கீதாவிற்குப் புத்தகம் கொடுத்ததை நீ பார்த்தாய்

இத்தொடரில், நான் என்பது தன்மை. நீ என்பது முன்னிலை. கீதா என்பது படர்க்கை

 

2.வினைச்சொல்

ஒரு பொருளின் தொழில் நிகழ்ச்சியைக் காட்டும் சொல்லுக்கு வினைச்சொல் என்று பெயர். வினைச்சொல் இறந்தகாலம், நிகழ்காலம், எதிர்காலம் என்னும் மூன்று காலத்தை ஏற்று திணை, பால், எண், இடம் ஆகியவற்றைத் தெரிவிக்கும்.  

சான்று

நடந்தான்

இதில்,

காலம் – இறந்தகாலம்

திணை – உயர்திணை

பால் – ஆண்பால்

எண் – ஒருமை

இடம் – தன்மை.

வினைச் சொல் வினைமுற்று, வினையெச்சம், பெயரெச்சம் என மூன்று வகைப்படும்.

வினைமுற்று (complete action word)

பெயர்ச்சொல்லுக்குத் துணையாக நின்று வாக்கியத்தின் பொருளை முடித்துகு் காட்ட வருவது வினை முற்றாகும்.

சான்று – அவள் ஓடினாள் (she ran)

வினையெச்சம் ( incompleated action ending with verb)

ஒரு வினையெச்சம் முற்றிலும் பொருள் தருவதற்காக ஒரு வினைமுற்றைத் தழுவி வரும். அதற்கு வினையெச்சம் என்று பெயர். இதனுடைய வினை (செயல்) முடிவு பெறாமல் நிற்கும். ஆனால் காலம் காட்டும்.

 சான்று – நான் படித்து முடித்தேன் (I finished reading)

பெயரெச்சம் (incompleate action ending with noun)

          ஒரு வினைச் சொல் முற்றிலும் பொருள் தருவதற்காகப் பெயர்ச்சொல்லைலத் தழுவி நிற்கும். இதற்குப் பெயரச்சம் என்று பெயர். இதில் காலம் தோன்றும். பால் தோன்றாது.

சான்று – நான் படித்த பள்ளி

[Verb are action words, they will also show the tense. Tenses are three types: Past tense (Irantha kaalam), Present tense (Nigazh kaalam), Future tense (Ethir kaalam). Tenses  are expressed in verb. When the word explains a completed action it is called vinai muttru. Vinai echam means an Incompleate action. When echa vinai ia completed with noun it is peyarechem. Vinai echem describes an incomleate action being completed with an action.]

3.  இடைச்சொல் (conjuction)

பெயர்ச்சொல்லுக்கும், வினைச்சொல்லுக்கும் முன்னும்,  பின்னும், இடையிலும் நின்று பொருளை விளக்கும் சொல் இடைச்சொல் எனப்படும்.

வேற்றுமை உருபுகள்

காலம் காட்டும் இடைநிலைகள்

சாரியைகள்

வினா எழுத்துகள்

சுட்டு எழுத்துகள்

உவமை உருபுகள்

அசைச்சொற்கள்

முதலியன இடைச்சொல் என வழங்கப்படுகின்றது.

சான்று

அவளோ வந்தாள்?   ( அவள் + ஓ)

இதில் அவள் என்ற பெயர்ச்சொல்லோடு ஓ என்ற அசைச்சொல் சேர்ந்து வினாப் பொருளை  உணர்த்துகின்றது.

[ when words are combined to make a sentence in English we use propositions. Likewise in tamil we use what we call vetturumai urubugal. These letters are called idaichol. They are also considered as one type of nouns. They can also act as particles]

4.   உரிச்சொல் (Adverb and Adjective)

தனித்து இயங்கும் ஆற்றல் இன்றி பெயர்சொல்லையோ, வினைச் சொல்லையோ அடுத்து நின்று அவற்றின் குணத்தை உணர்த்தும் உரிமை உடையனவாக வரும் சொல் உரிச்சொல் எனப்படும். இது பொருளின் தன்மையை மிகுதிப்படுத்தும். இது, ஒரு பொருள் குறித்த பல உரிச்சொல், பல பொருள் குறித்த ஓர் உரிச்சொல் என இருவகைப்படும்.

ஒரு பொருள் குறித்த பல உரிச்சொல் (Polysyllabic)

சால, தவ, உறு, நனி, கழி, கூர் என்னும் உரிச்சொற்கள் ஆறும் மிகுதி என்ற ஒரே பொருளை உணர்த்துகின்றன.

சான்று

உறு பொருள் – மிகுதியான பொருள்

நனி நன்று – மிக நன்று

பல பொருள் குறித்த ஓர் உரிச்சொல் (A word for many things)

கடி என்ற ஓர் உரிச்சொல் காவல், கூர்மை, நறுமணம், விளக்கம், அச்சம், விரைவு, மிகுதி, புதமை, ஒலித்தல், நீத்தல், திருமணம், காரம் என்ற 13 பொருள்களைத் தருகின்றன.

சான்று

கடி நகர்   - காவல் நகர்

கடி மிளகு - காரமான மிளகு

[Adjective is a word that means one to one. A word assumes the status of an adjective when it stands for multiple meanings, and when multiple words claim ownership of an object. It can be a noun, a verb, an adjective for a noun, an adjective for a verb, or a noun for a noun in general. The adjective can be of two types Polysyllabic, A word for many things]